Gjykata e Posaçme ka ndryshuar masën e sigurisë për Arben Spahiun e Arsen Preçin, duke i liruar. Këta persona janë arrestuar si të dyshuar nga prokuroria e Elbasanit për sigurim kushtesh për të kryer vrasje, e armëmbajtje pa leje e falsifikim dokumentesh, për rastin e gjetjes te ish-fabrika e konservimit në lagje Emin Matraxhiu me 18 shkurt të këtij viti.
Shumë pranë vendngjarjes u gjet dhe një çantë dore, brenda së cilës kishte një kartë identiteti greke, e dyshuar si e falsifikuar. Karta e identitetit kishte foton e Arben Spahiut. Brenda çantës gjithashtu u gjet edhe çelësi i makinës dhe një pistoletë.
Pak pas gjetjes së makinës dhe çantës së dorës, policia bëri të mundur arrestimin e Arben Spahiut dhe Arsen Preçit. Në momentin e arrestimit, atyre nuk iu është gjetur asgjë e kundraligjshme. Duke u nisur nga të dhënat e para, grupi hetimor hodhi dyshime për organizimin e një atentati të mundshëm ndaj shtetasit Elton Kila, i njohur ndryshe si “Oti i Elbasanit”.
Dyshimet ishin se e gjithë ngjarja mund të jetë inskenuar për të futur në kurth shtetasin Arben Spahiu, kunati i Erion Alibejt.
